Om oss
Vi ønskjer å dele denne heilt spesielle staden med fleire.
For oss handlar dette ikkje berre om ein plass å sove, men om eit pusterom – eit lite stykke ro ved Sognefjorden der kvardagen slepp taket.
Her finn du historie i veggane, frisk luft i lungene og god tid rundt bordet. Vi har lagt til rette for at du skal føle deg heime – anten du kjem for å fiske, utforske fjorden, nyte naturen eller berre roe heilt ned.
Då vi flytta tilbake til Wærholmen, visste vi at her låg det noko unikt. Med utsikt over fjorden og historie i kvar stein, har vi brukt både millionar og mange arbeidstimar på å pusse opp hus, naust og uteområde.
Det gamle båtloftet er no gjort om til ei lun og moderne leilegheit. Naustet – der Lailas far bygde båtar i fleire tiår – er restaurert og står klart for nytt liv. Verktøy og tradisjonar frå det gamle båtbyggeriet er framleis på plass, og vi håpar å skape eit levande miljø her igjen.
Dette er meir enn ein stad å bu. Det er ein plass å leve – og ein stad å dele.
Velkomen til Wærholmen – vi håpar du vil trivast like godt som vi gjer.
Wærholm havn
Den vesle hamna vår ligg godt skjerma til i vågen og har vore i bruk sidan 1700-talet. I dag fungerer ho som ei roleg og trygg gjestehamn for småbåtar og besøkande.
Her kan du legge til, fylle vatn, få straum og ta ein pause på brygga. Har du eigen båt og vil ligge over – ta kontakt!
Wærholm Kystlag/ Forbundet kysten
Wærholmen er ein del av Forbundet Kysten, og vi jobbar aktivt med å ta vare på kystkulturen her i området. Kystlaget vårt samlar folk som vil bidra, lære og dele kunnskap om båtar, byggjeskikk og tradisjonshandverk.
Vi arrangera kurs, treff og dugnader – og håpar fleire vil bli med og halde liv i det gamle båtbyggeriet. Bli medlem: https://kysten.no/bli-medlem